متحدہ عرب امارات نے یہ جوہری پلانٹ جنوبی کوریا کی معاونت سے مکمل کیا
ابوظہبی: متحدہ عرب امارات نے بجلی کی پیداوار کے لیے عرب دنیا کا اولین جوہری پلانٹ مکمل کرلیا۔
عرب میڈیا کے مطابق متحدہ عرب امارات کی جوہری توانائی کارپوریشن کی جانب سے جاری بیان میں جوہری برقی پلانٹ کی تکمیل کا اعلان کرتے ہوئے کہا گیا ہے کہ جوہری توانائی کی جانب یہ نہایت اہم قدم ہے۔
اس جوہری برقی پلانٹ سے حاصل ہونے والی بجلی ابوظہبی نیشنل آئل کمپنی (ادنوک) سمیت ایمریٹس اسٹیل اور ایمریٹس گلوبل ایلومینیم کو فراہم کی جائے گی۔
بیان میں مزید کہا گیا ہے کہ جوہری برقی پلانٹ سالانہ 40 ٹیرا واٹ بجلی پیدا کرنے کی صلاحیت رکھتا ہے جس سے ملک میں بجلی کی ضروریات کا 25 فیصد پورا ہوگا۔
یاد رہے کہ اس جوہری برقی پلانٹ کے پہلے ری ایکٹر نے 2020 میں کام کا آغاز کیا تھا اور اب چوتھا ری ایکٹر بھی مکمل طور پر آپریشنل ہوگیا۔
متحدہ عرب امارات کے صدر نے جوہری برقی پلانٹ کی تکمیل پر پوری ٹیم کو مبارک باد دیتے ہوئے کہا کہ یہ ہمارے کاربن کے صفر اخراج کی طرف سفر میں ایک اہم قدم ہے۔
سعودی عرب نے بھی جوہری ری ایکٹر بنانے کا ارادہ ظاہر کیا ہے تاہم متحدہ عرب امارات جوہری برقی پلانٹ بنانے والا پہلا عرب ملک بن گیا ہے۔
متحدہ عرب امارات نے یہ جوہری برقی پلانٹ جنوبی کوریا کی مدد سے تیار کیا ہے۔
