ہاکس بے پر کے ایم سی ہٹ کے ایک حصے کا ملبہ ساحل پر گرا ہوا ہے ۔ فوٹو : ایکسپریس
کراچی: بلدیہ عظمیٰ کراچی کے ہاکس بے پرہٹ کا اگلا حصہ عدم توجہی کے باعث بیٹھ گیا۔
دیواریں ٹوٹ گئیں، سمندری پانی اور مٹی ہٹ میں داخل ہوگئی، تفصیلات کے مطابق تفریحی مقام ہاکس بے پر کے ایم سی کا سرکاری ہٹ مسلسل عدم توجہ کا شکار ہے جس کی وجہ سے اس کی دیواریںکمزور ہوگئی تھیں،ان دنوں سمندر کی لہریں معمول سے زیادہ تیز ہیں اسی وجہ سے کمشنر نے سمندر پر نہانے پر پابندی عائد کی ہوئی ہے،تیزسمندری لہروں کی وجہ سے کے ایم سی کے ہٹ کا بوسیدہ حصہ اور کمزور دیواریں ٹوٹ گئیں۔
سمندرکی جانب والا حصہ گرگیا اور برساتی پانی ہٹ میں داخل ہوگیا جس کی وجہ سے پورے ہٹ میں مٹی داخل ہوگئی، سمندری پانی کی وجہ سے اندرونی حصہ بھی متاثرہوا ، ذرائع کا کہنا ہے کہ کے ایم سی کا ہٹ ماضی میں بہترین ہٹ میں شمار ہوتا تھا تاہم مسلسل عدم توجہی کے باعث اس کی تعمیرات بوسیدہ ہوگئی تھیں اور مرمتی کام نہیں کیا جاسکا جس کی وجہ سے ہٹ سمندری لہروں کا دباؤ برداشت نہ کرسکا اور دیواریں ٹوٹ گئیں۔
