کراچی:
ایکسپریس نیوز کی جانب سے سچ سامنے لانے پر بھارت بوکھلاہٹ کا شکار ہوگیا اور بھارت بھر میں ایکسپریس نیوز کے فیس بک پیج پر پابندی لگادی۔
بھارت نے مقبوضہ کشمیر کے علاقے پہلگام میں ہونے والے واقعے کے بعد حقائق سامنے لانے پر ایکسپریس نیوز کا فیس بک پیج پر پابندی لگادی ہے۔
فیس بک کے نوٹیفکیشن میں کوئی ٹھوس وجہ نہیں بتائی گئی ہے تاہم کہا گیا ہے کہ قانونی بنیاد پر شکایت کے باعث ایکسپریس نیوز کے فیک پیج تک رسائی محدود کردی گئی ہے اور یہ درخواست انفارمیشن ٹیکنالوجی سے متعلق مقامی قوانین کے تحت کی گئی تھی۔
مقبوضہ کشمیر کے علاقے پہلگام میں ہونے والے واقعے کے بعد بھارت نے پاکستان کے وزیراعظم کا یوٹیوب چینل، پاک فوج کے شعبہ تعلقات عامہ (آئی ایس پی آر) کا یوٹیوب چینل اور ایکس اکاؤنٹ سمیت متعدد کھلاڑیوں اور فن کاروں کے سوشل میڈیا اکاؤنٹس پر پابندی لگا دی تھی۔
بھارت نے پہلگام واقعے کے بعد پاکستان پر سنگین الزامات عائد کرتے ہوئے سندھ طاس معاہدہ ختم کرنے کا اعلان کیا تھا، جس کے بعد پاکستانی میڈیا نے بھارت کے جھوٹے بیانیے کا پردہ چاک کردیا تھا اور واقعے سے متعلق حقائق سامنے لانے میں کوئی کسر اٹھا نہیں رکھی تھی اور اس فہرست میں ایکسپریس نیوز سب سے آگے ہے۔
ایکسپریس نیوز نے پہلگام واقعے کے بعد حقیقت پر مبنی رپورٹنگ کی اور بھارت کے بے بنیاد الزامات اور پروپیگنڈے کی حقیقت آشکار کردی ہے اور صحافت کے معروضی اصولوں کی پیروی کرتے ہوئے بھارتی جنگی جنون کے مختلف پہلو دنیا کے سامنے لائے۔
بھارت سے ایکسپریس نیوز کی سچ پر مبنی رپورٹنگ ہضم نہیں ہوئی اور پاکستان کی میڈیا انڈسٹری کے سب سے زیادہ فالوورز رکھنے والے فیس بک پیچ ‘ایکسپریس نیوز ‘ پر بھارت میں پابندی عائد کردی ہے۔
ایکسپریس نیوز بھارتی حکومت کی اس مذموم حرکت کے باوجود سچ دنیا کے سامنے لاتا رہے گا اور بھارت کا پاکستان دشمن چہرہ دنیا کو دکھاتا رہے گا۔
واضح رہے کہ بھارت نے اس سے قبل قومی کرکٹ ٹیم کے کپتان محمد رضوان اور سابق کپتان بابراعظم کا سوشل میڈیا اکاؤنٹ بھی بھارت میں بند کردیا ہے، اسی طرح پاکستان سپر لیگ (پی ایس ایل) کی ٹیم لاہور قلندرز کے سوشل میڈیا اکاؤنٹس کو بھارت میں بند کردیا گیا ہے۔
بھارت نے پاکستان کے خلاف کھیل کے میدان میں دشمنی کا مظاہرہ کرتے ہوئے پہلگام واقعے کے بعد پی ایس ایل کی لائیو اسٹریمنگ بھی معطل کردی تھی اور بھارت میں موجود کرکٹ کے مداحوں کو پی ایس ایل کے میچوں سے محروم کردیا ہے۔
