کراچی:
پاکستان پیپلز پارٹی (پی پی پی) کے مرکزی سیکریٹری جنرل اور سینیئر سیاست دان سینیٹر تاج حیدر 83 برس کی عمر میں مختصر علالت کے بعد انتقال کرگئے۔
پی پی رہنما کے رہنما تاج حیدر کے اہل خانہ کے مطابق وہ مقامی اسپتال میں زیر علاج تھے اور آج انتقال کرگئے۔
تاج حیدر کی نماز جنازہ اور تدفین کا اعلان بعد میں کیا جائےگا۔
پی پی رہنما وقار مہدی نے بتایا کہ تاج حیدر ہمارے دیرینہ ساتھی اور بہترین سیاسی کارکن تھے، وہ پیپلز پارٹی کے بنیادی اور نظریاتی کارکنان میں سے ایک تھے۔
وقار مہدی کا کہنا تھا کہ تاج حیدر کی سیاسی خدمات کو فراموش نہیں کیا جاسکتا۔
پی پی پی کے مرکزی سیکریٹری جنرل اور سینیٹر تاج حیدر 8 مارچ 1942 کو راجستھان کے شہر کوٹہ کے علمی گھرانے میں پیدا ہوئے جبکہ ابتدائی تعلیم گورنمنٹ بوائز ہائی اسکول رنچھوڑ لائن کراچی سے حاصل کی۔
تاج حیدر فنونِ لطیفہ کے میدان میں آئے اور ٹیلی وژن کے لیے بھی لکھا، تاج حیدر نے اپنے ڈرامہ سیریل آبلہ پا میں پروفیسر آڈی والا کا کردار ادا کیا تھا، انہوں نے مختلف اخبارات میں کالم بھی لکھے۔
تاج حیدر نے 1967 کے سوشلسٹ کنونشن میں شرکت کی اور 1967 میں باقاعدہ طور پر پاکستان پیپلز پارٹی میں شمولیت اختیار کی اور ان کا شمار پاکستان پیپلز پارٹی کے بانی اراکین میں ہوتا تھا۔
مرحوم تاج حیدر کو 2012 میں ستارہ امتیاز برائے سائنسی خدمات دیا گیا، اس سے قبل 2006 میں انہیں تیرھواں پی ٹی وی ایوارڈ برائے مصنف بہترین ڈرامہ سیریل بھی دیا گیا۔
وزیر اعظم شہباز شریف نے پیپلز پارٹی کے سینئر رہنما اور بانی رکن تاج حیدر کے انتقال پر اظہار افسوس کیا اور ان کی جمہوریت کے لیے خدمات کو خراج عقیدت پیش کیا۔
انہوں نے کہا کہ تاج حیدر کی وفات سے پاکستان اہم سیاسی رہنما سے محروم ہوگیا ہے۔
وزیر اعظم نے مرحوم کے لیے دعائے مغفرت اور سوگواران کے ساتھ اظہار ہمدردی اور صبر و استقامت کی دعا کی۔
