کراچی:
گورنر سندھ کامران خان ٹیسوری نے کراچی کے مسائل کے حل کیلیے میئر کراچی مرتضی وہاب کو چھوٹا بھائی قرار دیتے ہوئے ساتھ چلنے کی پیش کش کردی۔
گورنر ہاؤس کراچی میں منعقدہ 8ویں دعوت افطار کے موقع پر اظہار خیال کرتے ہوئے گورنر سندھ نے کہا کہ میئر کراچی کا بیان نظر سے گزرا جس میں وہ اختیارات کی بات کررہے تھے۔
انہوں نے کہا کہ میں اپنے چھوٹے بھائی مرتضی وہاب کو پیش کش کرتا ہوں کہ آپ میرے پاس آئیں، آئینی حیثیت سے آپ کو تمام اختیارات دے دوں گا پھر چاہیے اس کے لیے مجھے عدالت ہی کیوں نہ جانا پڑے، سب کچھ میں بھگت لوں گا۔
گورنر سندھ نے کہا کہ میں عوام اور شہر کی بہتری کیلیے سب کچھ بھگتنے کو تیار ہوں، میئر کو تمام اختیارات دے دوں گا تاکہ شہر کی سڑکیں، گھروں میں پانی، کھلے مین ہول سمیت تمام مسائل حل ہوں اور بلدیاتی نمائندے بااختیار ہوکر عوام کی خدمت کریں۔
کامران خان ٹیسوری نے تقریب میں خطاب کرتے ہوئے جلد ہزاروں کو نوجوانوں کو نوکریاں اور بے گھر افراد کو چھت دینے کا بھی اعلان کیا اور کہا کہ اس پر کام جاری ہے۔
گورنر سندھ نے عوام سے اتحاد برقرار رکھنے کا اعلان کرتے ہوئے کہا کہ اگر متحد نہ ہوئے تو مسائل حل نہیں ہوں گے، جب بارش ہوتی ہے یا دیگر مسائل ہوتے ہیں تو اس کا سامنا تمام قومیتوں کے لوگ کرتے ہیں، اس لیے مل کر ہی تمام مسائل کو حل کرنا ہوگا۔
