اسلام آباد:
پاکستان میڈیکل اینڈ ڈینٹل کونسل نے ڈینٹل کورس کی معیاد 5 سال کرنے کا فیصلہ واپس لے لیا، کونسل نے گزشتہ سال ڈینٹل کا کورس 4 سال کی بجائے 5 سال کرنے کا فیصلہ لاگو کیا تھا۔
جبکہ صدر پی ایم ڈی سی نے ڈین پمز اسپتال کی حیثیت سے رٹائرمنٹ کے بعد دوسری بار بھی ملازمت میں توسیع کرا لی۔
ذرائع وزارت صحت کے مطابق ڈینٹل سرجنز ایسوسی ایشن کے دباؤ پر کونسل نے اپنا فیصلہ واپس لے لیا جبکہ پاکستان میڈیکل اینڈ ڈینٹل کونسل نے پرائیویٹ میڈیکل کالجز کی فیکلٹی کی عمر کی حد مزید پانچ سال بڑھا دی۔
پی ایم اینڈ ڈی سی نے پرائیویٹ میڈیکل کالجز میں فکلٹی کی عمر کی حد 70 سال سے بڑھا کر 75 سال کر دی، فکیلٹی کی عمر کی حد میں اضافہ و ڈینٹل کورس میں اضافہ واپس لینے کا فیصلہ کونسل کے 12 ویں اجلاس میں کیا گیا۔
ذرائع نے یہ بھی بتایا کہ پی ایم اینڈ ڈی سی کے صدر کی ریٹائرمنٹ کے بعد ڈین پمز کی مدت میں دوسری بار اضافہ 17 جنوری کو کر دیا گیا ہے۔
