شمالی وزیرستان کے قبائلی مشران نے معرکہ حق ’’آپریشن بنیان مرصوص‘‘میں فتح یابی پر خصوصی جرگے کا انعقاد کیا۔
ایکسپریس نیوز کے مطابق میرانشاہ کے غیور قبائلی مشران اور معززین نے پاک فوج کے ساتھ آپریشن بنیان مرصوص کی کامیابی پر خصوصی جرگے کا انعقاد کیا، جس میں قبائلی مشران و عمائدین سمیت اعلیٰ سول و عسکری حکام نے شرکت کی ۔
جنرل آفیسر کمانڈنگ میران شاہ ، میجر جنرل عادل افتخار نے بطور مہمان خصوصی جرگے میں شرکت کی ۔ انہوں نے معرکہ حق ’’آپریشن بنیان مرصوص‘‘ میں ساتھ دینے پر غیور قبائلی عوام کا شکریہ ادا کیا ۔
میجر جنرل عادل افتخار نے کہا کہ پوری قوم نے اتحاد و یکجہتی کا مظاہرہ کرتے ہوئے دشمن کے عزائم کو ناکام بنایا ۔ اس موقع پر شرکا نے افواج پاکستان کی عظیم کامیابی پر اللہ تعالیٰ کا شکر ادا کیا ۔
شرکا نے افواج پاکستان کے تمام شہدا بشمول آپریشن بنیان مرصوص میں شہادت کا رتبہ پانے والوں کی قربانیوں کو زبردست خراجِ عقیدت پیش کیا ۔ شرکا نے وطن سے والہانہ عقیدت کا اظہار کرتے ہوئے کہا کہ وہ دشمن کی کسی بھی جارحیت کا منہ توڑ جواب دینے کے لیے تیار ہیں ۔ غیور قبائلی عوام اپنی درخشاں روایات کے مطابق مستقبل میں بھی افواج پاکستان کا ہمیشہ ساتھ دیں گے ۔
شرکا نے اس خوشی کے موقع پر پورے شمالی وزیرستان میں افواج پاکستان کی کامیابی پر جشن منایا اور خصوصی ریلیوں کا اعلان کیا ۔
یوم تشکر؛ اسکردو کے طلبہ کا افواجِ پاکستان کو شاندار خراجِ تحسین
اسوہ بوائز اسکول اسکردو کے طلبہ نے افواجِ پاکستان کی شاندار فتح پر خوبصورت نغمے کی صورت میں زبردست خراجِ تحسین پیش کیا۔ نغمے کے بول’’میرے وطن یہ عقیدتیں وطن پر قربان‘‘ کے ذریعے طلبہ نے افواجِ پاکستان سے والہانہ عقیدت اور محبت کا اظہار کیا۔
طلبہ کا اس موقع پر کہنا تھا کہ پوری قوم افواج پاکستان کے شانہ بشانہ کھڑی ہے۔
