کراچی کے مصروف تجارتی علاقے فوارہ چوک، عبداللہ ہارون روڈ پر واقع ایک معروف شاپنگ سینٹر کی پانچویں منزل پر اچانک آگ بھڑک اٹھی جس نے دیکھتے ہی دیکھتے پوری منزل کو لپیٹ میں لے لیا۔
فائربریگیڈ حکام کے مطابق اطلاع ملتے ہی پانچ فائر ٹینڈرز، ایک اسنارکل اور ایک واٹر باؤزر موقع پر روانہ کیے گئے۔ ریسکیو ٹیموں نے فوری کارروائی کرتے ہوئے آگ بجھانے کا عمل شروع کر دیا جبکہ اسنارکل کے ذریعے شاپنگ سینٹر کی چھت پر پھنسے ہوئے متعدد افراد کو محفوظ مقام پر منتقل کیا گیا۔
شہر کی واٹر کارپوریشن نے بھی صورتحال کی سنگینی کو مدنظر رکھتے ہوئے نیپا ہائیڈرنٹ پر ایمرجنسی نافذ کر دی جہاں سے پانی سے بھرے واٹر ٹینکرز بلاتعطل متاثرہ مقام پر بھیجے جا رہے ہیں۔ پولیس کی بھاری نفری نے موقع پر پہنچ کر علاقے کو گھیرے میں لے لیا اور شہریوں کو متاثرہ عمارت سے دور رکھنے کے لیے حفاظتی اقدامات کیے۔
رات گئے فائربریگیڈ کی ٹیمیں آگ پر قابو پا لیا جبکہ آگ لگنے کی وجہ اور ممکنہ نقصانات کا تعین تاحال نہیں ہو سکا۔ ابتدائی اطلاعات کے مطابق کوئی جانی نقصان رپورٹ نہیں ہوا، تاہم شاپنگ سینٹر میں موجود قیمتی سامان جل کر خاکستر ہونے کا خدشہ ظاہر کیا جا رہا ہے۔
