کراچی:
یونیورسٹی روڈ حسن اسکوائر مچھلی کٹ کے قریب موٹر سائیکل سوار 2 مسلح ملزمان اسلحے کے زور پر گاڑی میں سوار پولیس اہلکار سے لوٹ مار کر رہے تھے اہلکار نے فائرنگ کر دی، جس سے دونوں ڈکیت زخمی ہوگئے۔
تفصیلات کے مطابق پیر کی صبح عزیز بھٹی تھانے کے علاقے یونیورسٹی روڈ حسن اسکوائر مچھلی کٹ کے قریب موٹر سائیکل سوار 2 مسلح ڈاکوؤں نے حسنات اکرم نامی طالب علم سے اسلحے کے زور پر موبائل فون اور نقدی چھین لی جبکہ اسی دوران مسلح ڈاکوؤں نے ایک گاڑی میں سوار شخص کو بھی اسلحے کے زور پر روکا اور لوٹ مار کرنے لگے تو گاڑی میں سوار شخص نے فائرنگ کر دی جس کے باعث دونوں ڈاکو زخمی ہوگئے۔
گاڑی میں سوار شخص نے مدد گار 15 پولیس کو اطلاع کر دی جس پر متعلقہ تھانے کی پولیس موقع پر پہنچ گئی اور دونوں زخمی ڈاکوؤں کو گرفتار کرکے ان کے قبضے سے اسلحہ، طالب علم کا چھینا ہوا موبائل فون اور نقدی برآمد کر لی جبکہ زخمی ڈاکوؤں کو فوری جناح اسپتال منتقل کر دیا گیا۔
عزیز بھٹی پولیس کے مطابق زخمی حالت میں گرفتار ڈاکوؤں کی شناخت صبیح حیدر ولد معید عباس اور محمد عثمان ولد جہانگیر کے نام سے کی گئی ہے۔
انہوں نے بتایا کہ گرفتار ڈاکو طالب علم سے لوٹ مار کرنے کے بعد گاڑی میں سوار پولیس اہلکار طفیل عباس سے لوٹ مار کرنے کی کوشش کر رہے تھے کہ جس پر پولیس اہلکار نے فائرنگ کرکے انہیں زخمی کر دیا۔
پولیس کے مطابق اہلکار طفیل عباس کمانڈ اینڈ کنٹرول روم میں تعینات ہے، واقعے کا مقدمہ متاثرہ طالب علم کی مدعیت میں درج کر لیا گیا جبکہ دوسرا مقدمہ گرفتار ڈاکوؤں سے ملنے والا غیر قانونی اسلحہ کا درج کیا گیا ہے۔
