لاہور:
شدید دھند کے باعث موٹروے پولیس نے عوام کی حفاظت کے پیش نظر موٹر وے کے مختلف سیکشنز کو عارضی طور پر بند کر دیا ہے۔
موٹروے پولیس کے ترجمان سید عمران احمد نے کہا ہے کہ موٹروے ایم 2 لاہور سے خانقاہ ڈوگرہ، ایم 3 لاہور سے رجانہ، ایم 4 پنڈی بھٹیاں سے ملتان، اور ایم 5 ملتان سے روہڑی سمیت لاہور سیالکوٹ موٹروے کو دھند کی شدت کے باعث بند کر دیا گیا ہے۔ ان سیکشنز پر شدید دھند کے باعث سفر کرنا انتہائی خطرناک ہو گیا ہے۔
ترجمان موٹروے پولیس کے مطابق، قومی شاہراہ پر بھی دھند کے باعث ٹھوکر، موہلنوال، مانگامنڈی، پتوکی اور اوکاڑہ تک دھند کی صورتحال ہے، جس کے باعث عوام کو سفر سے گریز کرنے اور احتیاطی تدابیر اختیار کرنے کی ہدایت کی گئی ہے۔
موٹروے پولیس نے شہریوں کو مشورہ دیا کہ وہ زیادہ سے زیادہ دن کے اوقات میں سفر کریں، کیونکہ صبح 10 بجے سے شام 6 بجے تک دھند کے موسم میں سفر کے لیے بہترین اوقات ہیں۔
مزید برآں ڈرائیورز کو اپنی گاڑیوں میں آگے اور پیچھے دھند والی فوگ لائٹس کے استعمال کی تاکید کی گئی ہے تاکہ روڈ کی ویو میں بہتری آئے۔
ترجمان نے یہ بھی کہا کہ عوام غیر ضروری سفر سے گریز کریں، تیز رفتاری سے پرہیز کریں اور اگلی گاڑی سے مناسب فاصلہ رکھیں تاکہ کسی بھی ناخوشگوار واقعے سے بچا جا سکے۔
موٹروے پولیس کی جانب سے تمام شہریوں سے درخواست کی گئی ہے کہ وہ معلومات اور مدد کے لیے ہیلپ لائن 130 پر رابطہ کریں۔
