بالی ووڈ کے مشہور اداکار رنبیر کپور نے اپنی نئی فیشن اور لائف اسٹائل برانڈ ARKS کی پہلی جھلک پیش کر دی، جو 14 فروری 2025 کو لانچ ہو رہی ہے۔
اس برانڈ کے ذریعے رنبیر کپور فیشن انڈسٹری میں قدم رکھ رہے ہیں۔ حال ہی میں جاری کردہ ایک ویڈیو میں وہ ممبئی کی سڑکوں پر سائیکلنگ کرتے نظر آ رہے ہیں، جہاں وہ شہر کے ساتھ اپنی گہری وابستگی کا اظہار کرتے ہیں۔
ان کی اہلیہ عالیہ بھٹ نے بھی اس پروجیکٹ پر اپنی خوشی کا اظہار کیا اور کپور کے خواب کو سپورٹ کیا۔
ویڈیو میں رنبیر کپور میرین ڈرائیو، باندرہ-ورلی سی لنک اور بینڈ اسٹینڈ پر اپنے والد رشی کپور کے مرئیل کے سامنے نظر آتے ہیں۔
وہ کہتے ہیں، “دنیا میں کئی شہروں کا سفر کیا، لیکن ممبئی جیسی توانائی کہیں نہیں ملی۔ یہ شہر مجھے بار بار کوشش کرنے اور کامیاب ہونے کا حوصلہ دیتا ہے۔”
رنبیر کپور نے پہلے ہی اپنی فیشن برانڈ لانچ کرنے کی خواہش ظاہر کی تھی، اور اب یہ خواب حقیقت بن رہا ہے۔ ARKS صرف اسنیکرز تک محدود نہیں ہوگی بلکہ اعلیٰ معیار کی سفید ٹی شرٹس، جینز اور شرٹس بھی فراہم کرے گی۔
رنبیر کپور جلد ہی سنجے لیلا بھنسالی کی فلم Love and War میں جلوہ گر ہوں گے، جس میں ان کے ساتھ عالیہ بھٹ اور وکی کوشل بھی شامل ہیں۔ اس کے علاوہ، وہ نیتیش تیواری کی رامائن پر مبنی فلم میں بھی کام کر رہے ہیں۔
