لاہور میں جماعت اسلامی کے دھرنے کا مقام تبدیل فوٹو:فائل
لاہور: جماعت اسلامی نے آج لاہور میں ہونیوالے احتجاجی جلسے اور دھرنے کا مقام تبدیل کردیا ہے۔
احتجاجی دھرنا اب وزیراعلی ہاؤس کے سامنے دینے کی بجائے مال روڈ پر فیصل کے قریب ہوگا، خواتین بھی شریک ہوں گی، امیرجماعت اسلامی حافظ نعیم الرحمن خطاب کریں گے۔ جلسہ گاہ کی تیاریاں شروع کردی گئیں۔
جماعت اسلامی راولپنڈی/اسلام آباد دھرنا ختم کرنے کے بعد لاہور میں آج پہلا احتجاجی جلسہ اور دھرنا دینے جارہی ہے۔ جماعت اسلامی نے بجلی کی قیمتوں میں اضافے، آی پی پیز کے ساتھ کئے گئے معاہدوں اورمہنگائی کے خلاف آج وزیراعلی ہاؤس کے سامنے احتجاجی دھرنا دینے کا اعلان کیا تھا تاہم اب جلسے اور دھرنے کی جگہ کا مقام تبدیل کردیا گیا ہے۔
جماعت اسلامی کے سیکرٹری جنرل امیر العظیم نے فیصل چوک میں جلسے کے نئے مقام کا جائزہ لیا ۔اس موقع پر میڈیا سے بات کرتے ہوئے انہوں نے کہا جماعت اسلامی نے آئی پی پیز مہنگائی بجلی بلوں میں ناجائز اضافے کے خلاف تحریک کا آغاز کر دیا ہے۔
انہوں نے مزید کہا کہ آج کے جلسے سے وہ عناصر سوچنے پر مجبور ہونگے جو کہتے تھے کہ جماعت اسلامی کو اسلام آباد دھرنے سے کچھ حاصل نہیں ہوا ہے، انہوں نے کہا عوامی طاقت سے ظلم کے نظام کو ختم کیا جا سکتا ہے۔ حکومت نے ٹائم فریم پر عمل نہ کیا تو سول نافرمانی اور ملک گیر ہڑتال کی طرف جائیں گے۔
