سماجی رابطے کے پلیٹ فارم ایکس (سابقہ ٹوئٹر) کے مالک ایلون مسک نے ایکس کے لیے نئے پرائیوٹ میسجنگ فیچر کا اعلان کر دیا۔ فیچر میں میسجز کے غائب ہوجانے اور ’بِٹ کوائن طرز‘ کی انکرپشن شامل ہوگی۔
ایکس چیٹ ٹول کا متعارف کرایا جانا پلیٹ فارم کو ’ایوری تھنگ ایپ‘ میں بدلنے کے ایلون مسک کے منصوبے کا ایک حصہ ہے۔
اکتوبر 2022 میں ٹوئٹر خریدنے اور اس کا نام بدل کر ایکس رکھنے کے بعد ایلون مسک پلیٹ فارم میں متعدد تبدیلیاں لائے ہیں اور اس کے ساتھ پے منٹ سسٹم کو جوڑنے اور اس کو ایک ’عالمی مارکیٹ پلیس‘ بنانے منصوبے پیش کیے ہیں۔
ایکس چیٹ (جو کہ اس وقت صرف بِیٹا ٹیسٹرز کو دستیاب ہے) صارفین کو ایکس کے ڈی ایم (ڈائریکٹ میسجز) فیچر کا ایک متبادل پیش کرتا ہے، جو اس کو واٹس ایپ یا ٹیلی گرام جیسی روایتی پیغام رساں ایپس جیسا بناتا ہے۔
ایلون مسک نے فیچر کا اعلان کرتے ہوئے ایکس پر ایک پوسٹ میں کہا کہ نیا ایکس چیٹ انکرپشن، میسج کے غائب ہو جانے اور کسی بھی قسم کی فائل بھیجنے کی صلاحیت کے ساتھ متعارف کرایا جا رہا ہے۔ اس میں آڈیو/ویڈیو کالنگ بھی ہے۔
