بالی وڈ کنگ شاہ رخ خان کے بیٹے آریان خان بطور ہدایتکار اپنے کیریئر کا آغاز کرنے جا رہے ہیں۔ نیٹ فلکس اور ریڈ چلیز انٹرٹینمنٹ کی مشترکہ پروڈکشن میں بننے والی اس سیریز کا اعلان لاس اینجلس میں کیا گیا۔
ریڈ چلیز انٹرٹینمنٹ کی پروڈیوسر گوری خان کی نگرانی میں بننے والی اس نئی سیریز کا پس منظر بالی وڈ کی فلمی دنیا پر مبنی ہوگا۔ یہ کہانی ایک باصلاحیت اور پرکشش نوجوان کے گرد گھومتی ہے جو فلمی دنیا کی چمک دمک اور مشکلات کے بیچ اپنی جگہ بنانے کی جدوجہد کرتا ہے۔
اس پروجیکٹ میں بالی وڈ کی بڑی شخصیات کے کیمیوز اور منفرد کردار دیکھنے کو ملیں گے۔ نیٹ فلکس کے مطابق یہ سیریز انڈین سینما کی شاندار اور خود پر مزاحیہ تصویر پیش کرے گی، جو شائقین کے لیے ایک ناقابل فراموش تجربہ ثابت ہوگی۔
شاہ رخ خان نے اس موقع پر کہا: “ہم نیٹ فلکس کے ساتھ اس پروجیکٹ کو پیش کرنے کے لیے بے حد پرجوش ہیں۔ یہ کہانی ایک نئے انداز میں فلمی دنیا کی عکاسی کرتی ہے، اور آریان خان کی محنت اور تخلیقی سوچ اس پروجیکٹ کو یادگار بنائے گی۔”
یہ سیریز 2025 میں نیٹ فلکس پر ریلیز ہوگی۔ نیٹ فلکس انڈیا کی نائب صدر مونیکا شریگل نے آریان خان کے بارے میں کہا: “آریان نے اپنی جراتمندانہ اور تخلیقی ہدایتکاری سے ایک منفرد پروجیکٹ تیار کیا ہے جو ناظرین کے دل جیت لے گا۔”
