کراچی:
شہرمیں سردی کی شدت میں کمی ہوگئی،کم سے کم درجہ حرارت 3 ڈگری بڑھ گیا جبکہ زیادہ سے زیادہ درجہ حرارت میں بھی 1.7 ڈگری اضافہ ریکارڈ ہوا، بدھ کو سمندری ہوائیں چلنے اور تیز دھوپ کی وجہ سے پارہ مزید بڑھ سکتا ہے۔
شہر میں یخ بستہ موسم کی شدت میں نمایاں کمی ہوگئی، دن کے بعد رات اور صبح کے درجہ حرارت میں بھی اضافہ ریکارڈ ہوناشروع ہوگیا، منگل کو کم سے کم پارہ گزشتہ روزکے مقابلے میں 3ڈگری اضافے سے15.5ڈگری سینٹی گریڈ جبکہ زیادہ سے زیادہ 1.7ڈگری اضافے سے30.7ڈگری ریکارڈ ہوا، منگل کو صبح کے وقت ہلکی دھند کی وجہ سے حدنگاہ 6کلومیٹر سے کم ہوکر3کلومیٹر ریکارڈ ہوئی۔
محکمہ موسمیات ارلی وارننگ سینٹر کی پیش گوئی کے مطابق آج سے تیز دھوپ کے سبب حدت بڑھنے کا امکان ہے، سمندر کی کئی روز سے غیرفعال ہوائیں آج سے بحال ہونے کی توقع ہے، آئندہ چند روز تک کم سے کم پارہ 17اور زیادہ سے زیادہ 32 ڈگری ریکارڈ ہوسکتا ہے۔
ارلی وارننگ سینٹرکے مطابق رات کے اوقات میں خنکی بدستور برقرار رہ سکتی ہے، صوبے کے وسطی و بالائی اضلاع میں صبح کے وقت دھند پڑ سکتی ہے۔
