کراچی:
شہر قائد میں حسین آباد کے علاقے میں پیش آنے والے فائرنگ کے واقعے میں نوجوان حارث ولد عبدالعزیز جاں بحق ہو گیا۔
واقعہ کل جمعہ کی صبح پیش آیا تھا، جب مقتول کو گولی مار کر قتل کیا گیا۔ پولیس کے مطابق مقتول عزیزآباد دو نمبر کا رہائشی اور بائیک رائیڈر تھا۔
پولیس کا کہنا ہے کہ واقعے کے بعد ملزم دلاور نے ازخود تھانے میں پیش ہو کر گرفتاری دے دی، جبکہ اس کا وڈیو بیان بھی منظرعام پر آ چکا ہے۔
بیان میں دلاور نے مؤقف اختیار کیا کہ مقتول حارث اس کا بچپن کا دوست تھا اور وہ میرے باڑے میں آیا تھا، جہاں میرا لوڈ پستول رکھا ہوا تھا۔ دلاور کا کہنا ہے کہ انجانے میں گولی چل گئی، اس کا کوئی ارادہ نہیں تھا۔
مزید پڑھیں: کراچی فائرنگ کے واقعات میں بچہ جاں بحق دو بھائی زخمی
ملزم نے مزید بتایا کہ فائرنگ کے بعد وہ خود حارث کو اسپتال لے کر گیا، جبکہ مقتول راستے میں اس سے باتیں بھی کرتا رہا۔ دلاور نے حارث کے اہل خانہ اور دیگر افراد سے معذرت کرتے ہوئے کہا ہے کہ یہ ایک حادثاتی واقعہ تھا، جس پر وہ دل سے معافی کا طلبگار ہے۔
پولیس کا کہنا ہے کہ ملزم کے قبضے سے برآمد ہونے والے اسلحے کا کوئی لائسنس تاحال پیش نہیں کیا جا سکا، جبکہ ابتدائی تفتیش میں ملزم کے دوستوں نے غلط بیانی کر کے پولیس کو گمراہ کرنے کی کوشش کی۔
