کراچی:
پی آئی اے کا فضائی میزبان موبائل فونز کی اسملنگ میں ملوث کراچی بیس(قومی ائیرلائن ڈویژن) سے تعلق رکھنے والاسینئرفلائٹ اسٹیورڈ فیصل مجید پہنور کینیڈا سے وطن واپسی کی پرواز پی کے 782کے ذریعے پاکستان پہنچا جہاں اس سے 16 موبائل فون برآمد ہوئے اور اس کے بعد پی آئی اے انتظامیہ نے فضائی میزبان کو شوکاز نوٹس جار کیا۔
ائیرپورٹ پرمتعین کسٹم حکام نے شک کی بنا پر مذکورہ کیبن کریو کی تلاشی لی جس کے دوران اس کے جسم سے مہارت کےساتھ چپکے 16 موبائل فون برآمد کیے گئے۔
جنرل مینیجر پی آئی اے فلائٹ سروسز کی جانب سےجاری شوکاز نوٹس کے متن کے مطابق پرواز کے ذریعے ایئرپورٹ آمد پر مسافروں کے کسٹم چیکنگ کے دوران آپ کے پاس جسم سے چپکے 16 موبائل فون برآمد ہوئے ہیں، ایمپلائز ڈسپلنری پالیسی کے تحت یہ رویہ بدانتظامی کا سبب ہے جس کے باعث آپ کو فوری طور پر ڈیوٹی سے معطل کیاجاتا ہے۔
کمپنی کی طرف سے دی گئی کسی بھی سہولت کا غلط استعمال اور اسملنگ میں ملوث ہونے کے شبے اور دوسروں کے ساتھ اس کام میں وابستہ ہونے کے معقول شبے کی بنیاد پر جاری شوکاز نوٹس موصول ہونے کے تین روز کے دوران تحریری طور پر نوٹس کا جواب دینے کے پابند ہوں گے۔
