سندھ میں ایچ ون این ون انفلوئنزا کے کیسز میں اضافے کے پیش نظرڈائریکٹر جنرل ( ڈی جی) صحت سندھ نے فوری اقدامات کی ہدایت جاری کردی۔
محکمہ صحت سندھ کی جانب سے تمام ضلعی ہیلتھ افسران، سرکاری اسپتالوں کے میڈیکل سپرنٹنڈنٹس اور دیگر متعلقہ حکام کوجاری مراسلے میں کہا گیا ہے کہ تمام اسپتالوں میں ایچ ون این ون کیسز کی سخت مانیٹرنگ کی جائے۔مشتبہ اور تصدیق شدہ کیسز کی فوری اطلاع صوبائی ہیلتھ آفس کو دی جائے۔اسپتالوں میں عملے کے لیے پی پی ای کٹس سمیت حفاظتی اقدامات کو یقینی بنایا جائے۔
مراسلے میں ہدایت کی گئی ہے کہ عوام میں آگاہی مہم چلائی جائے تاکہ وہ ماسک پہننےاورسماجی فاصلہ برقرار رکھنے جیسے حفاظتی تدابیر اپنائیں۔انفلوئنزا کی ویکسینیشن پر زور دیا جائے خاص طور پر کمزور افراد، طبی عملے، بچوں اور بیمار افراد کو ویکسین لگوانے کی ترغیب دی جائے۔تمام طبی مراکز انفیکشن کنٹرول پروٹوکولز پر سختی سے عمل کریں۔
ضلعی افسران روزانہ کی بنیاد پر کیسز اور درپیش چیلنجز کی رپورٹ جمع کرائیں۔محکمہ صحت کے مطابق احتیاطی تدابیر اور بروقت ویکسینیشن سے اس وائرس کے پھیلاؤ کو روکا جا سکتا ہے۔ عوام کو بھی ہدایت دی گئی ہے کہ وہ بلا ضرورت ہجوم میں جانے سے گریز کریں اور بیماری کی علامات ظاہر ہونے پر فوری ڈاکٹر سے رجوع کریں۔
