امریکی ریئلٹی ٹی وی اسٹار و معروف ماڈل کایلی جینر کے محض 18 الفاظ کی ایک ٹوئیٹ سے سوشل شیئرنگ ایپلی کیشن اسنیپ چیٹ کو ایک کھرب 30 ارب روپے (ایک ارب 30 کروڑ ڈالر) کا نقصان ہوا ہے۔
ساتھ ہی ان الفاظ کے باعث فیس بک کو کم سے کم 13 کھرب روپے (13 ارب ڈالر) کا فائدہ بھی ہوا ہے۔
کایلی جینر نے 22 فروری کو اپنی ایک مختصر ٹوئیٹ میں سوالیہ انداز میں کہا تھا کہ ان کی طرح کیا کوئی اور بھی اسنیپ چیٹ استعمال نہیں کرتا، ساتھ ہی انہوں نے افسوس کا اظہار بھی کیا۔
ان کی اسی ٹوئیٹ پر اسنیپ چیٹ کی قدر میں ایک دم کمی دیکھی گئی اور اسے اندازا ایک ارب 30 کروڑ امریکی ڈالرز یعنی پاکستانی ایک کھرب 30 ارب روپے سے زائد کا نقصان اٹھانا پڑا۔
sooo does anyone else not open Snapchat anymore? Or is it just me… ugh this is so sad.
— Kylie Jenner (@KylieJenner) February 21, 2018
ٹی ایم زیڈ کے مطابق کایلی جینر کی ٹوئیٹ کے محض 24 گھنٹوں کے اندر ہی بازار حصص میں اسنیپ چیٹ کی قدر میں نمایاں کمی ہوئی، اور کمپنی کو ایک کھرب 30 ارب روپے کا نقصان اٹھانا پڑا۔
اگرچہ 20 سالہ کایلی جینر نے ایک اور ٹوئیٹ کرکے اسنیپ چیٹ کو اپنی پہلی پسند اور پہلا پیار بھی قرار دیا، تاہم تب تک معاملہ بگڑ چکا تھا۔
still love you tho snap … my first love
— Kylie Jenner (@KylieJenner) February 21, 2018
ٹی ایم زیڈ نے ہی اپنی ایک رپورٹ میں بتایا کہ جس دوران کایلی جینر کی ٹوئیٹ سے اسنیپ چیٹ کو ایک کھرب روپے سے زائد کا نقصان ہوا، اسی دوران فیس بک کو کم سے کم 13 ارب امریکی ڈالرز یعنی پاکستانی 13 کھرب روپے سے زائد کا فائدہ بھی ہوا۔
کایلی جینر کی ٹوئیٹ کے بعد اچانک 24 گھنٹوں کے دوران بازار حصص میں فیس بک کی قدر میں تیزی آگئی اور اس کی مجموعی قدر 519 ارب ڈالرز سے بڑھ کر 532 ارب ڈالر سے بھی زائد ہوگئی۔
یعنی 24 گھنٹوں کے دوران کایلی جینر کے محص 18 عام الفاظ سے فیس بک کو کم سے کم 13 ارب ڈالر یعنی پاکستانی 13 کھرب روپے کا فائدہ ہوا۔
کایلی جینر کی اسی ایک ٹوئیٹ کے بعد یہ چہ مگوئیاں کی جا رہی ہیں کہ کیا یہ ٹوئیٹ بھی کسی ڈیل کے تحت کی گئی تھی؟
واضح رہے کہ 20 سالہ کایلی جینر نے رواں ماہ 5 فروری کو پہلے بچے کو جنم دیا، ان کے ہاں پیدا ہونے والی بیٹی کی تصویر نے انسٹاگرام پر ایک نیا اعزاز حاصل کیا تھا۔
ان کی نوزائدہ بیٹی کو ایک ہی دن میں انسٹاگرام پر ڈیڑھ کروڑ سے زائد افراد نے لائیک کیا تھا، اتنے لائیکس آج تک کسی انسٹاگرام تصویر کو نہیں ملے۔